DEBUXOS DOS CONTOS DE MARGARIDA

Neste curso como os exploradores creceron un montón, xa poden facer cousas moi importantes, cousas de maiores.

Coma todos os venres, Margarida presta libros aos peques de Reboreda e deben traelos de volta o luns. Cada un mete na súa carpeta aquel libro que máis lle interesa ou lle gusta nese momento, na mesma carpeta van as recomedacións de como se debe coidar o material que nos presta Margarida e cando o debemos traer de volta á escola. Pero neste curso temos unha novidade, debemos facer unha ficha que recolla os datos do libro que levamos. Temos que escribir: o noso nome, o título do libro e facer un debuxo que conte a historia do conto.

A tarefa ás veces non é doada porque o título está escrito cunhas letras moi raras que non coñecemos todavía pero papi e mami están sempre atentos para axudarnos cando temos un problema. Ás veces eles escriben o título en maiúsculas, outras veces dinnos como se escribe cada letra, outras escriben nun papel aparte para que os peques copien o título sen problemas,…., cada un busca os recursos máis axeitados.

A nosa intención non é que os nosos peques teñan que realizar duras tarefas na fin de semana, NON!!! Queremos que compartades con eles uns momentiños especiais e que non sexa unha obriga. Como cando lle ledes o conto antes de ir durmir! Este sempre é e debe ser un momento moi especial, de complicidade, de estar pretiño un co outro, de compartir ilusións e soños, de regalarse mimos e caricias.

Estas dúas semanas foron xeniais. Na primeira aínda estabamos un pouquiño despistados pero na segunda xa xurdiron historias cheas de cor e imaxinación. Bravo por tod@s, sodes fantásticos!!!

VISITA SEMANAL A BIBLIO DE MARGARIDA

Xa démos comezo as visitas semanais á bibioteca de Margarida. Retrasámonos un pouco porque ata outubro Margarida non tiña preparada a biblioteca, coa nova distribución, cos novos libros,… e logo cada venres nós tiñamos algunha actividade, como: os aniversarios, contacontos, samaín, etc, que retrasaban o noso desembarco na biblio.

Margarida estaba un pouco preocupada porque pensaba que estes grandes letores se esqueceran dela pero non e así, chegaron con moitas gañas de devorar libros cos seus pequenos olliños cheos de ilusións e inquedanzas.

Así foi o noso primeiro día deste curso, con novas rutinas e novas formas de traballar na biblio xa coma todos uns expertos letores. Atentos, atentos…